PUISI BALI

Pesta Kesenian Bali
( Gelah Krama Bali)

PKB kasambat
Pesta Kesenian Bali kaucap
Genah wong Bali ngalumampahang angga
nyolahang raga
ngendingang gending buana
genah malila cita
nodya kaluihan budaya
tradisi sané sampun kajanaloka
PKB gumanti dados piranti
ngajegang budaya bali
mangda ajeg ngantos riwekas
nenten sirna salantang masa
ngawetuang amerta
Wantah wong Bali sané prasida
ngajegang, ngajum, ngalimbakang indiké punika
Sakémaon patut elingang
iteh nyolahang igel-igelan
nabuhang sarwa tetangguran
ngendingang gending purwa
kaajumang baan puji puja
kakoplokang cihna angob ngaksi lengut pangus sesolahané punika
galang keneh asliaban
dumadak tusing ngantos ilang
nlektekang unduk di jaba
telah uyak wong selat segara
asasih acarane mamargi
kudang jinah medal saking soang-soang krama
sané wénten ring Art Centre
Yén punika sami ka semeton Bali
gumanti PKB sayan-sayan
sayuakti gelah krama Bali
Sang maraga seni sida nyumbungang budaya leluhur
Sang mraga wésya
sida ngamolihang pangupajiwa saking irika
anggen nyambung kauripan ipuné lan sentana
Sentana Bali sujati sané pacang nerusang ngrajegang budaya Bali

I Komang Alit Juliartha
Kacang Apit, 25 Juni 2015

Artikel Bahasa Bali Ajin BBMe menek

Ajin BBMé Menék

Nyabran Rahina cingakin ring marginé cerik- cerik kalih para yowanané pasliweran ngukur jalan nganginang ngawanang tusing karuan.  Minab tusing tawanga  ajin BBMé menék. Ulah aluh ngegas montor sing nolih ajin lengis.

Ngawit tanggal 17 November 2014 BBM menék ajinné saking Rp. 6.500,00  dados Rp.8.500,00  menék ajinné malih Rp. 2.000,00. Gumanti niki sané banget dados kapikayunin olih masarakat sané ekonominyané embuh. Yén BBMé menék sinah sampun ajin barang tiosan utaminipun barang soroh sembako pastika bareng menék. Yéning sembako menék , sinah masarakat cenik lakar ngaméwehanag numbas sembako punika. Napi malih nénten kaimbangin  antuk kenaikan upah . nika mawinan akéh masarakaté malajah irit , irit tekén lengis, irit tekén sembako, miwah irit sané tiosan.

Ajin BBMé ngamenékang punika boya ja tanpa parerembugan dumun.  Punika janten sampun kabligbagin olih Bapak Présidén kasarengin antuk menteri-menteri danéné. Sané dados pertimbangan risajeroning ngamenékang ajin BBMé wantah subsidi sané kakeniang ring BBM nénten tepat guna utawi nénten anut ring tetujon ipun. Subsidi BBM punika wantah kaicén ring masarakat cenik boya masarakat sané sampun madué utawi masarakat sané sugih.  Punika dados dasar pamréntah sané anyar ngamenékang ajin BBMé. Subsidi punika kari, sakéwala mangkin mangda sayuakti kanggén tur kaicén olih masarakat cenik anggén menain infrastrukutur minakadi jalan, pengairan sawah utawi carik,taler anggén prabiaya pendidikan , keséhatan miwah sané tiosan.

Ritepengan jagaté mangkin kapimpin olih pamimpin anyar, iraga dados rakyat patut ngicén galah utawi kesempatan ring Bapak Présidén mimpin selami 5 warsa. Iraga pinaka masarakat saking timur ngambel sané kawastanin tata susila utawi étika. Cutet, icén dumun galah ring pamréntah sané anyar puniki ngamargiang program-program dané. Sampunang iraga makarya huru – hara sané nénten wénten pikenohipun. Bilih- bilih démo ngantos ngawetuang biuta utawi lumbrah kaucap anarkis, nénten pisan maciri dados masarakat sané nyungsung tata susila utawi étika. Sakéwala iraga patut ngiwasin program- program punika mangda jakti-jakti program punika neked ring rakyat cenik. Ngiring jaga tur piara panegara iriki mangda sida jagaté santi sutrepti.

Bangli, 19 November 2014

I Komang Alit Juliartha