Cerpen ini pernah terbit di Bali Orti dan sudah di bukukan dalam Buku Swecan Widhi karya I Komang Alit Juliartha dengan penerbit Pustaka Ekspresi
BIANGLALA
Dasa tiban
suba liwat, paingetan ento enu marawat-rawat tan prasida ban tiang ngengsapang.
Makudang-kudang kenangan ada dini . Yéh tukadé ening ngatisin manah sang sané
nyingakin, kedis-kedisé saling ngamalunin ngalih padi di sawahé. Sawah sané dumun
ngantos mangkin kantun kacingak asri durung keni pangalalah Globalisasi. Tiang
negak di batuné jalan tiang pidan manutur-nuturan ngajak Luh Ayu. Kasiran
anginé ngampehang tiang mawali ka paingetané pidan.
Tatkala
punika langité panes sakéwala mimbuh misi ujan gerimis. Tiang negak-negak
sareng Luh Ayu.
“ Bli Mang,
mai maémbon. Eda maujan-ujanan.”
“ Binjepan
Luh. Depang yéh ujané nepén awak Bli Mangé. Depang sunaran matan ainé ngangetin
ragan Bli Mangé,” pasaut tiangé sinambi ngidem marep menék ngarasayang
kawéntenan jagaté ring Taman Sari sané menawi sué pacang nénten karasayang
malih.
Luh Ayu
makenyem ningehang munyin tiangé. Ipun uning tiang demen pesan tekén ujan. Ipun
sampun uling cerik ajak tiang bareng. Uling di TK ngantos masuk ring SMP setata
mabarengan. ipun wantah pisagan tiangé. Umahné nampek saking umah tiangé.
Makeloné ajak bareng kadirasa tiang sareng ipun suba manyama. Sakéwala ring
atin tiangé meled pesan mani puan Luh Ayu lakar anggon tunangan. Paras ipuné
jegég ngulangunin ati, ayu pesan nyak patuh cara adané. Kenyemné manis isitné
ngembang rijasa ngaé luluh keneh tiangé yén suba ada diarepan ipun. Kulitné
putih gading gumanti sekadi nak luh ané edot-edotang tiang.
“ Bli Mang,
ada bianglala.”
Raosné Luh
Ayu ngéntenin tiang ané sedek ngarasayang dingin ketélan yéh ujané. Ipun nujuin
tiang ada bianglala di bucun langité kangin. Bagia pesan ipun tepukin tiang.
Tiang masi kéto. Seneng nepukin bianglala. Kocap dadong tiangé ngorahang yén
suba ada bianglala wantah nyiriang ada dedari pacang masiram ring pakayonan.
Pepitu akéh dedariné manut sekadi akéh warnan bianglalané. Bianglalané risasat
neduhang kawéntenan jagaté sané kalintang panes ban polusi ané tan surud-surud
ngawi leteh ring sekancan buana. Yéh di kota tusing malih cara ipidan , ening.
Mangkin suba puek, resem misi leluu plastik mabrarakan. Umané suba telah
kadadosang wewangunan ané tegehné bisa tegehan tekén punyan nyuh. Neked abing ,
pangkung kajujukan hotél, villa muah sané lianan. Panes guminé sangkaning
punyan-punyanané telah kasénsor olih manusa sané nénten naénin urati tekén
palemahan, nénten naénin ngenehang pianak cucu mani puan. Tuah bianglala ané
prasida ngatisin keneh tiangé sareng Luh Ayu yadian sampun panumaya tiang
pacang ngorahang unduk lakar ngalahin Luh Ayu padidian.
“ Luh!”
“Éngkén Bli
Mang? Bli Mang tusing demen nyingakin bianglala?”
Tiang mendep
kadirasa sukil pisan pacang ngorahang. Sué sampun tiang sareng Luh Ayu
mabarengan. Yusan tiangé limang bulan wayahan tekéning ipun. Ento makada tiang
satmaka belin ipuné padidi. Mémé bapa dijumah suba pada nawang tiang makanténan
sareng Luh Ayu raket pesan. Nika mawinan mémé bapa ngorahin tiang pamitan
sareng Luh Ayu mangda nénten Luh Ayu kaliwat sedih ngenehang tiang ané luas
tusing ngorang-ngorang.
“ Bli demen
nyingakin bianglala Luh. Luih pesan pakantenané ngawi déwék Bli Mangé teduh,
tis, girang liang.”
Mautsaha
malih tiang ngalih celah ngantosang galah pacang ngorahang unduk ané uling
aminggu tusing suud-suud bakat kakenehang.
“ Luh, Bli
Mang lakar luas.”
Luh Ayu
makipekan. Paliatné ané iwawu galang nyiriang ipun liang sané mangkin makejang
ilang. Luh Ayu seken pisan nlektekang tiang. Miribang kadéna macanda apa ané
wawu kaorahang. Tiang anak mula demen pesan macanda. Sabilang wai apang maan
dogén macanda, pakedek pakenyung. Sakéwala uling semengan tiang tusing ngidang
kadi asapunika. Kenehé baat lakar pamitan ngajak timpal sekadi adi sekadi
tunangan ané lakar katinggal ngantos tiban-tibanan.
“ Seken Bli
Mang lakar luas? Luas kija? Dadi tumbén misi ngorahang ngajak tiang? Biasané
Bli Mang kapah maorahan,” patakon Luh Ayu kapining tiang.
Tiang sedih
ningehang patakoné Luh Ayu . Sebet lakar ngalahin ipun makelo sajan. Ninggal
makejang ané ada dini. Ninggal sekancan kenangan ané suba karasayang. Sakéwala
tiang musti ngorahang, musti ngalahin ento makejang mangda sida ngarereh masa
depan.
“ Ampura Luh
. Bli Mang tusing ngidang lakar terus-terusan bareng ngajak Luh dini. Bli Mang
bin mani lakar luas ka luar negeri nugtug Bapa ditu makuli. Bli Mang ditongos
ané baru lakar ngalanjutang masuk sekolah. Bli Mang sebet ngalahin Luh. Kéwala
Bli Mang musti bareng kemu. Mémé Bapa masi ditu lakar ngalih pangupajiwa.”
Tusing makelo
disubané tiang wusan ngorang lakar ka luar negeri , nyrékcék ngetél yéh
paningalan Luh Ayuné, ngeling gerong-gerong minab ipun tusing percaya tiang
énggal pesan lakar ngalahin ipun. Tiang tusing ngidang ngomong apa sajabaning
tuah ngelut ipun tan mari ngelus-elus bok ipuné selem lantang neked di
bangkiang.
Luh Ayu kari ngeling sigsigan tanpa rérénan. Tiang malih ngalanturang raos
tiangé.
“ Luh eda bes
sanget sebet. Bli Mang majanji tanggal 15 September buin dasa tiban Bli Mang
lakar mulih ka Bali ngalih Luh. Antosang Bli Mang dini. Bareng-bareng buin
nyingakin bianglala.”
Luh Ayu
ngusap-usap yéh paningalan ipuné tumuli nyingakin tiang raris ipun masaut, “
Nggih Bli Mang. Tiang misadia mangantosang sapetekan Bli Mangé. Kéwala Bli Mang
musti inget tekén janjin Bli Mangé kapining tiang ané mara kaucapang. Eda Bli
Mang nilar semaya.”
Tiang digelis nyautin pabesené Luh Ayu.
“ Nah Luh.
Bli Mang majanji lakar mawali mulih ka Bali ngalih Luh dini.”
“ Sajan naé
Bli Mang.”
“ Sajan Luh!”
Dasa tiban
suba matilar semayané ento kari pedas kaingetang. Tiang enu negak diduur batu
jalan tiang pidan negak bareng ngajak Luh Ayu. Jani genep suba dasa tiban.
Tanggal 15 Séptember 2014. Tiang suba nepatin janji . Tiang jani suba mawali
dini di Taman Sari. Sakéwala Luh Ayu tusing teka-teka. Uling semengan tiang
negak. Nganti ujané tuun Luh Ayu tusing masi ngenah muncuk cunguhné. Apa mirib
Luh Ayu engsap tekén dinané jani? Apa Luh Ayu suba ngelah gegélan nganti tusing
bani katemu ngajak tiang? Liu patakon ané tidong –tidong rauh ring keneh
tiangé.
Guminé sampun
tengai. Matan ainé tan malih remrem kasaputin gulem. Makipekan tiang marep kauh
tepukin tiang anak bajang jegég pesan malaib maénggal-énggalan mirib suba
tusing tahan pacang matemu sareng nak muani sané banget kaidam-idamang. Tiang
majujuk. Ipun sampun wénten diarep tiangé.
“ Bli Mang? ”
matakon ipun sinambi matujuhan ring tiang makacihna ipun nyekenang napi
sayuakti tiang puniki Bli Komang ané pidan ngantos mangkin banget kasayangang.
“ Nggih Luh!”
Pramangkin
Luh Ayu ngameekin tiang laut ngelut tiang tekek pesan. Belus tundun tiangé
karasayang keni yéh peningalan. Tiang makenyem bagia Luh Ayu seken-seken
misadia mangantosang sapetekan tiang mawali.
“ Kadén Bli
Mang Luh engsap tekén dinané jani. Mapan uling semeng Bli Mang dini ngantiang
Luh tusing masi teka.”
“ Ampura Bli
Mang. Tiang wawu kari nulungin mémé magarapan di paon.”
Waluyaning kaiterin ban sahananing sari. Kupu-kupu pada girang macanda saling
marebut menceg ring sarwa bebungan ané tumbuh di taman ati. Bagia pesan manah
tiangé tan kadi-kadi. Ngelah kanténan sané gumanti satya mangantosang tiang
mawali.
Ngalor ngidul
tuturé tusing suud-suud matemuang keneh ané suba makelo kateenang. Luh Ayu
nyambat ipun tusing ngelah gegélan sawiréh ngantosang tiang. Kéto masi tiang
setata inget tekén semayané ipidan lakar mulih ngalih Luh Ayu.
Tiang sareng
Luh Ayu negak ring batuné. Irika tiang marep kangin sekadi daweg tiang
ngucapang janji dasa tiban ané sampun lintang. Luh Ayu matolihan ring tiang
sinambi nujuin di bucun langité kangin
“ Bli Mang,
tusing ada bianglala. Mara kan ujan. Dadi bisa tusing ada ngenah bianglalané
ento?”
Cingakin tiang
muané Luh Ayu nadaksara masebeng layu minab sedih ring galahé punika bianglala
tan prasida nyarengin ipun ngarasayang bagia.
“ Tusing
sabilang suud ujan lakar terus ada bianglala Luh.”
“Dadi kéto
Bli Mang?”
“Miriban
dedariné tan kayun pacang masiram.”
“ Dadi bisa
tan kayun masiram Bli Mang? ” patakon ipuné cucud.
“ Dedariné
ring suargan tan kayun tedun ka marcapada sawiréh dedariné samian kimud, lek
jroning manah tan purun nyaihang angga napi malih pacang masanding ngajak
kajegégan I Luhé ané tanpa tanding luihan tekéning dedari-dedari ring Kéndran.”
Luh Ayu malih
semitané sekadi jati mula, masunar galang. Kenyem manis ipuné nyaluksuk ngantos
ka jantung tiangé. Sada lek-lekan ipun raris ngimpit bangkiang tiangé.
“ Ah.. Bli
Mang gombal!”
Tiang nolih
Luh Ayu. Kéto masi Luh Ayu makipekan laut nlektekang muan tiangé. Cingakin
tiang ada bianglala di buletan paningalan Luh Ayuné. Luh Ayu pateh nyingakin
biang lala di penyingakan tiangé ané sipit. Ngawanénang raga tiang ngecup
bibihné Luh Ayu saha ngucapang.
“ Bli Mang
sayang jak Luh.
I Komang Alit Juliartha
Kacang Apit, 5 Januari 2015
